Heimilisinnréttingar

Þar sem veðrið hér á klakanum er bara eins og það er þá verður maður að finna sér eitthvað að gera innanhús og þá datt mér í hug að það væri nú kominn tími til að finna almennilegan skenk í stofuna. Voilá, þennan flotta eikarskenk fundum við Hannibal í Egó Dekor (við erum einnig með borðstofuborð og stóla þaðan) og erum við bæði mjög ánægð með hann (þó hann hafi verið eitthvað of þungur fyrir hefðbundnar flutningaleiðir....). Nú geymir hann allavega öll áfengisglös heimilisins og einnig flest allt sem áfengt er hjá okkur...... Furðulegt hvað kemst lítið í svona stóran skáp! En samt skárra en ekki neitt.

Svo er Hannibal stunginn af til Síberíu þar sem hann ætlar að vera í heila viku, m.a. á einhverri álráðstefnu en svo einnig 2 daga í Moskvu. Það verður spennandi að heyra hvað hann hefur að segja eftir þessa ferð.....

Annars er ég búin að vera ansi dugleg í þessari fyrstu vinnuvikunni minni: Búin að mæta á 2 blakæfingar, finna nýja hundapíu (er komin í yngsta systurina í fjölskyldunni sem hefur séð mér fyrir hundapíum síðan 2005!), þrifa húsið næstum því alveg, taka eldhúsið í gegn og endurraða í skápa og hillur, sulta nóg til að duga mér næstu árin (tek kannski eitthvað með mér til mömmu í október til að sitja ekki uppi með það fram eftir öllu) og hjóla nokkrum sinnum með Títus svo hann komist nú líka í eitthvað form. En hef ennþá ekkert gert í garðinum (fyrir utan berjatínslu), kannski best að leita sér að garðyrkjumanni líka?!?