Veðrið hér þessa daga er alveg einstaklega fallegt, verst bara að við þurfum að vinna í 28°C hita! En í gær ákvað ég nú að draga Hannibal á ströndina eftir vinnunni. Beta var búin að segja mér frá fínu litlu sandströndinni sem er 5 mínútur frá heimili hennar svo ég bara brunaði heim rétt fyrir klukkan 6 til að ná í nýja bikinið mitt og stuttbuxur fyrir Hannibal og svo fórum við á ströndina. Það kom okkur Íslendingum alveg á óvart að hún var ekki við sjóinn heldur við einhverja á! Við einfaldlega bjuggumst við því að strönd hlaut að vera við hafið, en það er náttúrulega alveg jafn æðislegt að sitja við einhverja á! Því miður fór sólin nú bráðum að lækka og þá kolnaði of mikið til að sitja lengi, og vatnið var líka aðeins of kalt til að skella sér út í, en það var samt frábært að komast aðeins úr hitanum og miðbænum.....
Og nú vitum við líka að sænskar mýflugur vilja frekar svissneskt blóð heldur en alíslenskt.... ég var bitin (eða stungin? enginn var alveg viss um hvers konar kvíkindi þetta hafði verið) fjórum sinnum á meðan Hannibal slapp alveg ómeiddur! Breskt blóð kemur svo greinilega í öðru sæti á vinsældalistanum, maurinn fékk nefnilega líka tvö bit.....
Keine Kommentare:
Kommentar veröffentlichen